Muhammed Seif Khatib ni mzaliwa wa Kijiji cha Umbuji, Zanzibar, mwaka 1951. Alisomea ualimu katika Chuo cha Ualimu cha Nkrumah, Zanzibar. Baada ya kusomesha kwa muda, akajiunga na Chuo Kikuu cha Dar es Salaam na kuhitimu shahada ya B.A. Ed. katika fani ya Fasihi, Isimu, Taaluma ya Maendeleo na Ualimu mwaka 1978. Mwaka 1982 alitunukiwa shahada ya M.A. katika Chuo Kikuu cha London (SOAS). Muhammed Seif
Khatib ni Mwanasiasa shakii, mwandishi mahiri na mshairi razini. Baadhi ya vitabu vya ushairi wa malenga huyu, ni pamoja na Ukombozi wa Zanzibar
(OUP: 1975); Pambazuko la Afrika (EAP: 1982); Fungate ya Uhuru (D.U.P 1988); na Taarab Zanzibar (TPH, 1992).
Muhammed Seif Khatib ni mtunzi wa mashairi wa miaka mingi na amechapisha vitabu vingi vya mashairi. Usanii wake umevuka bahari za ushairi na kumfikisha kwenye kisiwa cha waandishi wa hadithi fupi ambapo umaarufu wake umejitokeza kwenye kitabu chake kipya cha Kipanga.
Wasakatonge ni diwani yake mpya yenye hazina ya mashairi yenye kubainisha sauti kali ya utetezi kwa wavujajasho wanaonyanyaswa, kuonewa, kudharauliwa na kunyonywa nguvu zao. Ni kauli inayobainisha uoza wa jamii na athari zake kwa wanyonge. Diwani hii ni chachu ya kuuzindua umma ulioghilibiwa ili udai haki yao dhidi ya wanasiasa madikteta wanaotumia nguvu za dola kwa maslahi yao. Kitabu hiki mbali ya kuwa na kina kizito cha maudhui, fani yake pia imetia
fora. Kwa wale wapendao ushairi "bulibuli" wa Kiswahili hiki ndicho kitabu chao. Wanafunzi wa sekondari, vyuo na vyuo vikuu watafaidika sana wasomapo diwani hii. Mwishoni mwa kitabu hiki, kuna orodha ndefu ya maneno na maana zake ambayo bila shaka yatakuwa hazina kubwa katika kuyafaidi na kuyaelewa ipasavyo mashairi haya.